餐盤上嘅自然風光☀️沖繩必食料理合集

今日小編來到美麗嘅海邊，享受沖繩料理！今次來到嘅呢間餐廳喺位於沖繩恩納村，餐廳主打歐式風沖繩料理，務求將沖繩最自然最新鮮嘅特色食材，配合歐式料理手法，將前所未有嘅體驗帶比所有客人！

事不宜遲，睇睇今日有咩食啦！

💎 海葡萄水雲蒸蛋

廚師將水雲切成一截截，撈喺蛋液入面，再加上一點點香草豐富味道。除咗會食到滑捋捋嘅蒸蛋之餘，仲會食到水雲爽脆嘅口感。加上超長一大串海葡萄同白花瓣點綴，海葡萄粒粒都脹卜卜，食落去口感類似三文魚籽。作為頭盤，首先已經帶比等哋超獨特嘅體驗！

💎 水雲炸飯糰

以沖繩米加上一截截水雲同沖繩香腸，握成球狀之後再拎去炸。以沖繩原產蔬菜為襯托，加上一點茄汁調味，口味獨特嘅炸飯糰！雖然係炸物，但係感受唔到油膩感，相信小朋友都會十分鍾意！水雲本身喺十分有營養嘅super food，唔使驚成道菜會太邪惡啦～ 

💎 香檸汁意粉

講起西式料理，點少得意粉呢～呢碟意粉嘅特別之處，就喺用咗沖繩特有嘅果實—香檸。意粉上面點綴嘅水雲同海葡萄，都混有清爽嘅香檸汁。傳統意粉嘅醬汁可能會越食越膩，而且熱量好高，但喺香檸汁意粉嘅口味酸酸微微，十分開胃！再加上香檸、水雲、海葡萄，三者都喺熱量低而且營養價值極高嘅食材，食意粉都可以食得健康！

💎 薯仔忌廉凍湯

凍湯喺歐洲經典嘅夏天湯品，一飲即刻涼心透～薯仔嘅味道可口，仲會感受到淡淡嘅香檸果香味！廚師上菜後，都會喺你面前畫上最後點綴，白色嘅凍湯瞬間變成畫布，在場嘅每一位客人都會得到廚師精心製作嘅獨一無二嘅「藝術畫🎨」！真喺好唔捨得飲呀～

💎 福圓豬肉&香腸配水雲飯糰

肉汁豐富，肉質彈牙，而且帶有獨特甜美嘅味道，真係一試傾心呀！再配以清新嘅水雲飯糰，兩者完美配合，係一道食到超滿足嘅主菜～

沖繩福圓豬嘅祕密在於飼料製造、豬隻飼養至豬肉加工都係由福圓農場一手包辦，因此培養出優質沖繩豬，而且得到HACCP（食物安全重點控制）認證㗎！

💎 時令生果配黑糖慕絲&水雲海葡萄雪葩

甜品有冰冰涼涼嘅慕絲同雪葩。黑糖唔同一般砂糖，黑糖甜度較低而且營養價值高。慕絲食落去唔會太膩，十分清新！雪葩十分涼爽，一去飽滯感，再加上水雲同海葡萄，令雪葩增添爽脆口感！加埋當地嘅時令生果，睇到都流口水呀！

五星級大師水準嘅美食，加上法式精緻嘅擺盤，一次過滿足小編觸覺、視覺、味覺同嗅覺嘅享受呀！餐廳環境簡約舒適，旁邊仲有一望無際嘅大海，喺一個咁輕鬆悠閑嘅氛圍下用餐，真係人生一大享受～

 

皿の上の自然 il Gastro Sara

📍 〒904-0414 沖縄県国頭郡恩納村前兼久466-7 1F

☎️ 098-987-7688

🌐 https://www.obn-sara.com/

*需預約