沖繩冬之藍海🌊Cafe限定Menu食後感🍽️

位於西營盤嘅cafe 骨子裡 Bone Studio喺11月26號開始就開始提供以 #沖繩冬之藍海 為主題嘅限定餐牌！今日我哋帶大家一齊去試下限定餐牌入面嘅菜式同埋飲品，有興趣嘅朋友記得要親身去試下！！

🌊沖繩海の恩物水雲春雨冷麵
來到可以先嗌店長推介嘅冷麵，一上菜會見到被蝶豆花染成藍色嘅湯水同埋冷麵，就好似沖繩嘅湛藍大海一樣～冷麵做法類似韓國水冷麵，大家喺食之前記得先將一旁嘅醬汁加落去湯入面(店主特調和風醬，食得出有好香嘅芝麻味，而且酸酸甜甜非常清爽開胃✨🌱)，同埋將wasabi撈匀先好食呀！
配菜方面有半隻溏心蛋、蟹棒同埋用咗本店提供嘅水雲！佢哋用咗壽司醋為水雲簡單調味，同冷麵撈埋一齊食更添爽脆口感𠻹～

🌊沖繩海風維也納珈琲
來到cafe當然要飲下咖啡☕～呢杯維也納珈琲係小編嘅最愛💖💖💖！！佢係沖繩限定改良版嘅維也納珈琲，面層嘅忌廉加入咗沖繩海鹽發打，加埋朱古力漿，飲落居然係多咗啲牛油味😳！加埋底層甜甜嘅濃縮咖啡，飲落層次非常豐富～

🌊烤棉花糖沖繩黑糖拿鐵
呢杯黑糖拿鐵味道當然唔會出錯，用來打卡都好合適📷！面頭嘅綿花糖同黑糖都有用火熗烘烤過，為咖啡帶來一份焦香味，下面嘅latte用咗味道溫和嘅nutty口味咖啡，就算唔係好飲得慣咖啡或者怕苦嘅朋友都可以試下！😉

🌊現烤玄米茶紅豆蛋糕配沖繩海鹽雪糕
呢個配搭感覺都頗常見，望落好簡單但係好好食🥰！味道平衡得十分好，玄米茶蛋糕唔會好甜而且有少少蘋果肉做點綴🍎，單食都唔會覺得悶；而海鹽雪糕亦都唔會因為太咸而食到喉嚨唔舒服，海鹽嘅咸味同雲呢拿嘅甜味balance得幾好。你想紅豆同蛋糕一齊食又得，一啖雪糕一啖蛋糕又得，點搭都係咁好食～😋

🌊沖繩海風香檬蛋糕と芝士布丁Parfait
另一個小編非常喜歡嘅就係呢個芭菲😍！布丁一挖發現原來係超creamy質感嘅布丁，食落口蛋味仲好濃郁𠻹(勁中小編口味💗)下一層就係香檸蛋糕、忌廉同埋檸檬雪葩，口味一下子變得好清新，就無咁快食膩啦～再下一層有沖繩海鹽雪糕，雪糕入面仲有啲餅碎增加口感，亦都中和一下雪糕嘅咸味。最底層係味道比較清淡嘅黑糖啫喱，作為收尾可以清一清口入面嘅味道，個人都覺得幾唔錯！😘

最後我哋無試到沖繩黑糖手搖冰珈琲，呢個就要交比大家去試啦🥹！只要惠顧沖繩限定餐牌入面嘅食物或飲品滿$300，仲會送你一份TOTE BAG禮物包🎁！依加店內仲有店主Boni手繪嘅海洋壁畫🐳，店裡面氣氛輕鬆又舒適，好適合去放鬆一下自己，學似沖繩人一樣享受慢活時光，忙碌之中搵返一啲喘息嘅空間✨🧘🏻

📅日期：2022年11月26日至12月20日
📍地址：西營盤般咸道38號2B地鋪
🕐營業時間：星期一、五 8:00-16:30；星期二11:00-17:00；星期六日及公眾假期：10:00-17:30；休息：星期三、星期四