沖繩Jurassic Park！？全新主題公園JUNGLIA 2025年開幕

去沖繩旅行，大部份都係去南部、中部玩，北部通常都係去水族館，不過喺2025 年夏天，沖繩北部將會變成必去地點，勁有Jurassic Park feel 嘅全新主題樂園「 JUNGLIA (ジャングリア)」將會喺明年開幕！

鄰近「世界自然遺產」

JUNGLIA，一睇個名就知道同「Jungle」有關，地點位於Orion 嵐山高爾夫球場嘅舊址，鄰近2021 年被登錄為「世界自然遺產」嘅「山原國家公園」，山原嘅高降雨量、高濕度，加上當地豐富嘅物種，真係啱晒呢個熱帶雨林主題樂園呀！

侏羅紀式雨林冒險

喺宣傳片睇到，JUNGLIA 會帶遊客去一次雨林冒險。遊客可以坐熱氣球飛越雨林，360 度俯瞰大海，或者喺樹林入面玩滑索，甚至可以搭越野車睇恐龍（又或者被恐龍追？），真係勁似《侏羅紀公園》場景呀！

大自然度假村

度假村、各類餐飲設施亦唔少得，喺宣傳中仲見到度假村位處雨林之中，亦有無邊際泳池，遊客可以盡情喺大自然充電，就好似口號一樣「Power Vacance」，喺度假之後可以有充滿電嘅感覺！官方計劃提供一日券，亦有額外收費嘅特別體驗（即係USJ 買fast pass 咁？）

大阪環球影城「救世主」森岡毅負責經營

項目由「刀KATANA」公司負責，CEO 森岡毅就係拯救瀕臨破產嘅大阪環球影城嘅「救世主」，佢只係用咗5年，就由2010年730萬嘅入場人數，去到2015年嘅 1390 萬，仲擊敗東京迪士尼樂園成為世界第 4 位。早喺2018 年佢就講過想喺沖繩開發主題樂園，喺2025年大家就可以去玩喇！

期待有更多資料公布！

JUNGLIA (ジャングリア)
📍沖繩縣國頭郡今歸仁村吳我山